DOBRODOŠLI

ДОБРОДОШЛИ

WELCOME

Medžuslovjanski jest jezyk, ktory Slovjani iz raznyh narodov koristajut, že by komuniko­vali medžu soboju. To jest možno, ibo slovjanske jezyki sut shodna i srodna grupa. Znanje jednogo jezyka obyčno jest dosta­točno, že by imělo se priblizno pojmanje, o čem jest tekst na kakom-nebuď drugom slovjanskom jezyku. Črez věki, Slovjani sut naučili dogovarjati se so svojimi susědami posredstvom prostyh, improvi­zovanyh narěčij. Jedno­časno, medžu­sobna shodnosť vsěh slovjanskih jezykov jest nadyhala jezyko­znavcev i drugih k tvorjenju generičnogo slovjanskogo jezyka, razum­livogo vsěm Slovjanam. Srěd nih nahodet se slavny staro­crkovno­slovjanski jezyk iz 9. stolětja, kak i mnoge ine projekty, publikovane od 16. stolětja do dnes pod imenami kako «vses­lovjanski», «medžu­slovjanski», «novo­slovjanski», «obče­slovjanski» ili prosto «slovjanski», vse osnovane na těhže pred­položenjah, čo čini ih blizko identičnymi.

Меджусловјански јест језык, кторы Словјани из разных народов користајут, же бы комуни­ковали меджу собоју. То јест можно, ибо словјанске језыки сут сходна и сродна група. Знанје једного језыка обычно јест доста­точно, же бы имело се приблизно појманје, о чем јест текст на каком-небудь другом словјанском језыку. Чрез веки, Словјани сут научили договарьати се со својими суседами посредством простых, импрови­зованых наречиј. Једно­часно, меджу­собна сходность всех словјанских језыков јест надыхала језыко­знавцев и других к творјенју генеричного словјанского језыка, разум­ливого всем Словјанам. Сред них находет се славны старо­црковно­словјански језык из 9. столетја, как и многе ине пројекты, публиковане од 16. столетја до днес под именами како «все­словјански», «меджу­словјански», «ново­словјански», «обче­словјански» или просто «словјански», все основане на техже пред­положенјах, чо чини их близко идентичными.

Interslavic is a language used by Slavs of different nations for communication among themselves. This is made possible by the fact that the Slavic languages are a relatively coherent family: knowing one of them is usually sufficient to get a rough idea of what a text in any other Slavic language is about. Throughout the centuries, Slavs have learned to talk to their neighbours by means of simple, improvised language forms. Simultaneously, the similarity of the Slavic languages has inspired linguists and others to create a generic Slavic language that would be under­standable for all Slavs alike. This includes the famous Church Slavonic language from the 9th century, as well as many other projects, published from the 16th century onwards under names like „Pan-Slavic”, „Interslavic”, „New Slavic”, „Common Slavic” or simply „Slavic”, all based on the same assumptions and therefore nearly identical.

Dnešnjego dnja nad medžuslovjanskim rabotajut dva projekty, Slovjanski i Novosloviensky. Oni dělet so soboju naturalističnu gramatiku, jedin slovnik, obču společnosť, razne města na sěti i jedin obči ceľ: opisati jezyk na samom središči živyh slovjanskih jezykov, ktory vsi Slovjani razumějut bez nikakoj poprědnjej nauki i mogut koristati poslě minimalnoj nauki. Projekt «Slovjanski» jest počel svoju dějatelnosť v 2006 godě s celjem stvorjenja legkogo, natu­rali­stičnogo pomočnogo jezyka za Slovjanov. O projektě «Novosloviensky», osnovanom bezposrednjo na staro­crkovno­slovjanskom i izdanom v 2010 godě, možete čitati sdě.

Днешньего дньа над меджусловјанским работајут два пројекты, Словјански и Новословѣнскы. Они делет со собоју натуралистичну граматику, једин словник, обчу сполечность, разне места на сети и једин обчи цель: описати језык на самом средишчи живых словјанских језыков, кторы вси Словјани разумејут без никакој попредньеј науки и могут користати после минималној науки. Пројект «Словјански» јест почел своју дејателность в 2006 годе с цельем створьенја легкого, нату­рали­стичного помочного језыка за Словјанов. О пројекте «Новословѣнскы», основаном безпосредньо на старо­црковно­словјанском и изданом в 2010 годе, можете читати сде.

Nowadays the Interslavic language is worked on by two projects, Slovianski and Neoslavonic. They share a naturalistic grammar, a common dictionary, one community, several places on the net and one common goal: describing a language that is at the very centre of the modern Slavic languages, and which all Slavs can understand without any prior study and use after some minimal learning only. The Slovianski project was started in 2006 as a simple and naturalistic interlanguage for Slavs. About Neoslavonic, based on Old Church Slavonic and published in 2010, you can read here.

Za čo medžuslovjanski? Koristi takogo jezyka sut različne:

• može byti velika pomoč za putovateljev,
• možno jest osegnuti cely slovjanski svět posredstvom vebsajtov, forov i t.d. bez potreby prevodženja informacije na razne narodne jezyki,
• znajuč medžuslovjanski, člověk lěpje razuměje teksty na kojem-nebuď slovjanskom jezyku,
• dobra metoda k bystrějšej, legšej naukě drugogo slovjanskogo jezyka.

За чо меджусловјански? Користи такого језыка сут различне:

• може быти велика помоч за путовательев,
• можно јест осегнути целы словјански свет посред­ством вебсајтов, форов и т.д. без потребы преводженја информације на разне народне језыки,
• знајуч меджусловјански, чловек лепје разумеје тексты на којем-небудь словјанском језыку,
• добра метода к быстрејшеј, легшеј науке другого словјанского језыка.

Why Interslavic? Such a language can be useful for various purposes:

• it can be a great help for travellers
• you can address the entire Slavic world via websites, fora etc., without having to translate your information into several languages
• a person who knows Interslavic will have a better understanding of a text in any Slavic language
• it is an excellent method for quicker and easier learning of a second Slavic language.

Izgled medžuslovjanskogo teksta jest zavisny od raznyh činiteljev: kto piše, za kogo, kakim srědstvom i kakim cěljem. Za to predstavjajemo elastičny sostav slov i instrumentov, osnovany konsekventno na kombinaciji praslovjanskogo s živymi slovjanskimi jezykami. Raz­ličnym koristnikam predlagajemo dva razne tipy gramatiki: prvy eksperimentalny i krajno oproščeny za turistov i početkujučih ne-Slovjanov (Slovianto), a drugi vyše približeny k prirodnym jezykam za medžu­slovjanske kontakty. Kromě osnov medžu­slovjanskogo jezyka, na tyh stranicah nahodite prikladne teksty, orudja, linki i inu informaciju. V najblizšej budučosti planujemo dodati kurs jezyka. Nakonec, zovemo vas, že byste takože posětili naše forum, naše internetne novosti i našu viki.

Изглед меджусловјанского текста јест зависны од разных чинительев: кто пише, за кого, каким средством и каким цельем. За то представјајeмо еластичны состав слов и инструментов, основаны консеквентно на комбинацији прасловјанского с живыми словјанскими језыками. Раз­личным користникам предлагајемо два разне типы граматики: првы експерименталны и крајно опрошчены за туристов и почеткујучих не-Словјанов (Словианто), а други выше приближены к природным језыкам за меджу­словјанске контакты. Кроме основ меджу­словјан­ского језыка, на тых страницах находите прикладне тексты, орудја, линки и ину информацију. В најблизшеј будучости планујемо додати курс језыка. Наконец, зовемо вас, же бысте такоже посетили наше форум, наше интернетне новости и нашу вики.

What a text in Interslavic looks like, depends of several factors: who is writing, for whom, by what means and for what purpose. Therefore we present you with a flexible set of words and tools, consistently based on Proto-Slavic in combination with the living Slavic languages. For different sorts of users, we offer two different grammar types: one experimental, highly simplified type for tourists and beginning non-Slavs (Slovianto), and one more similar to the natural languages for Interslavic contacts. On these pages, except for the basics of Interslavic, you will find text samples, tools, links and more. In the nearest future, we hope to add a language course as well. At least, you are also invited to visit our forum, our news site and our wiki.

Želajemo vam prijemnogo i, imajmo naděju, upotrebi­mogo pobytja!

Желајемо вам пријемного и, имајмо надеју, употреби­мого побытја!

We wish you a pleasant and, hopefully, useful stay!

Sodržanje

Содржанjе

Table of contents